Mwanafunzi auawa kikatili, mwili wake waokotwa shimoni ukiwa kichwa chini miguu juu

Kamanda wa polisi kulia, Phillip Kalangi na Mkuu wa upelelezi wa makosa ya jinai Mkoa Kagera, Bw. Peter Matagi wakiwaonesha waandishi wa habari  (hawako pichani) magunia yaliosheheni bhangi waliokamata katika msako maalum unaoendelea mkoani hapa.

Na Theonestina Juma, Bukoba

MWANAFUNZI wa kike wa kidato cha pili katika shule ya sekondari ya Kaagya, Advea Makanyaga (16) amekutwa akiwa ameuawa kikatili kwa kunyongwa shingo, kuvunjwa taya la kulia na kubakwa na kisha mwili wake kutupwa shimoni.

Habari zilizopatikana mjini hapa jana na kuthibitishwa na Kamanda wa Polisi Mkoani Kagara, Phillip Kalangi tukio hilo lilitokea Juni 24, mwaka huu majira ya jioni katika kitongoji cha Bishaka kijiji cha Mushoju kata  Kaagya tarafa ya Bugabo katika halmashauri ya wilaya ya  Bukoba.

Kamanda Kalangi alisema siku ya tukio mwanafunzi huyo ambaye alikuwa akiishi na bibi yake Bi. Meriselina Bigira (53) alimpelekea chakula mchungaji wao aliyejulikana kwa jina la Peter Mabara (25) katika eneo la machugani nje kidogo na nyumbani kwao.

Alisema lakini kwa siku hiyo mtoto huyo hakuweza kurejea nyumbani kama ilivyo kawaida yake, hivyo bibi yake kuanza kuingiliwa wasi wasi na kutoa taarifa katika kituo cha polisi cha Kishanje Juni 25, mwaka huu ambapo alianza kutafutwa.

Alisema katika utafutaji huo, mwanafunzi huyo alikutwa akiwa ameuawa na mwili wake kutupwa kwenye korongo lililopo kwenye mbunga ya kuchungia mifugo akiwa ametumbukizwa kwenye shimo kichwa chini na miguu juu huku jiwe kubwa likiwa limemkandamiza kichwani.

Hata hivyo, kutokana na tukio hilo, mwili wa marehemu ulipofanyiwa na uchunguzi na daktari ambaye kamanda hakuweza kusema ni wa hospitali gani ulibaini  amevunjwa taya la kulia na shingo na pia alibakwa kabla ya kuuawa.

Alisema katika uchunguzi huo ulibaini pia marehemu alikuwa na michumbuko yenye kutoa damu kwenye sehemu zake za siri, huku nguo  chupi yake aliokuwa amevaa kwa wakati huo ikiwa imechanwa pia ‘skin tight’aliokuwa amevaa ikiwa imepandishwa tumboni.

Hata hivyo, habari zaidi zinaeleza kuwa chanzo cha mauaji hayo, ni kuwa  mchungaji wao huyo, Bw. Mabara alikuwa akimtaka kimapenzi mwanafunzi huyo lakini alikuwa akimkataa.

Mchungaji huyo ambaye amefanikiwa kufanya kazi ya kuchunga ng’ombe katika familia hiyo kwa miaka miwili mfululizo hadi hivi sasa alifanikiwa kukamatwa jana katika kituo cha mabasi cha Bukoba mjini akijaribu kutoroka kwenda kwao Kahama.

Bw. Mabara anashikiliwa katika kituo kikuu cha Polisi mjini hapa kwa mahojiano zaidi ambapo anatarajiwa kufikishwa mahakamani muda wowote mara baada ya uchunguzi wa polisi kukamilika.

Mwisho.