Baada ya kuelezwa bei ya kahawa kushuka katika soko la dunia, wakulima wa zao hilo Kagera wadaiwa kugoma kuiuzia KCU 1990 LT

Bukoba
BAADA ya kuelezwa kuwa bei ya zao la kahawa kushuka katika soko la dunia wakulima wa zao mkoani Kagera wamesema hawapo tayari kuuza kahawa yao kwa bei ya chini tofauti na iliyotangazwa kwenye mkutano mkuu wa makisio wa Chama Kikuu cha Ushirika (KCU 1990 LTD).

Wakizungumza mjini Bukoba jana kwa nyakati tofauti, wakulima hao walisema katika mkutano uliofanyika mwezi Aprili mwaka huu walitangaziwa bei itakayotumika msimu huu, lakini wanashangaa kupelekewa barua ya kupunguzwa kwa bei ya awali.
Walisema maandalizi ya kahawa yanachukua muda mrefu na inaandaliwa kwa gharama kubwa, hivyo hawatakubaliana na sababu yoyote ya kupunguza bei hiyo.

Mmoja wa wakulima hao, Burchard Lawrent, alisema bei ya awali ilikuwa nafuu ndiyo maana wakakubaliana nayo na kwamba, wanapinga kauli ya KCU kuwa tatizo hilo limetokana na bei ya kahawa kushuka soko la dunia.

 “Hatukubali. Kama kweli bei imeshuka soko la dunia mbona kampuni binafsi wananunua kwa bei ya juu na hawajatangaza kupunguza, hilo soko linaiathiri KCU pekee?” alihoji Lawrent.
Alisema kama KCU wataendelea kug’ang’ania kununua kahawa kwa bei ya punguzo hawatauza, badala yake watauzia kampuni binafsi.

Mwanzoni mwa Mei mwaka huu, KCU ilitangaza bei ya kununulia kahawa ya wakulima msimu wa 2012/13,  kahawa aina ya Robusta maganda ilitangazwa kununuliwa kwa Sh1,360 kwa kilo, huku Arabica maganda ikitangazwa Sh1,550.

Pia, Robusta safi ilitangazwa kununuliwa kwa Sh2,700 kwa kilo na  Sh3,200 kwa Arabica safi, huku kahawa ya Arabica  organic iliyotangazwa ilikuwa Sh3,800, Robusta ya Organic Sh3,650 na Robusta Organic ya Uganda Sh1,700.

Kwa mujibu wa barua iliyoandikwa Juni 19, mwaka huu na kusainiwa na Meneja wa KCU, Vedasto Ngaiza na kusambazwa kwa vyama vyote vya ushirika vya msingi, bei ya kahawa inapungua tofauti na iliyotangazwa awali kwa madai ya kushuka kwa bei soko la dunia.

Barua hiyo inasema robusta ya maganda imepungua kutoka Sh1,360 hadi Sh1,100 kwa kilo moja, robusta safi imepungua kutoka Sh2,700 hadi Sh2,200.

Pia, barua hiyo inasema kahawa aina ya Arabica maganda imepungua kutoka Sh3,200 hadi Sh2,600.
Chama hicho katika msimu huu kinatarajia kukusanya tani 15,000 za kahawa kati ya makusanyo hayo tani 1,750 zinatarajiwa kuwa kahawa safi.