Kudaiwa kuporoka kwa bei ya samaki soko la Dunia, wavuvi wainyoshea kidole serikali

 Na Theonestina Juma, Bukoba

WAVUVI na wakala wa samaki katika Ziwa Victoria upande wa Mkoa Kagera wameiomba serikali kuingilia kati kutatua mgogoro ulioibuka kati yao na wamiliki wa viwanda vya samaki vilivyoko mkoani Mwanza, kutokana na kile kinachodaiwa kushuka kwa bei ya samaki katika soko la dunia.

Wavuvi na wakala hao wamesema hayo jana wakati wakizungumza na Blog hii kwa nyakati tofauti kwa njia ya simu kutoka katika visiwa vya ikuza Wilayani Muleba.

Walisema mgogoro uliopo kati yao ni kutokana na kushuka kwa bei ya samaki wanaowauzia kutoka sh. 4,800 - 5,500 hadi kufikia sh. 3,000 - 2,600 kwa kilo, kiasi ambacho hakilingani na kazi wanayoifanya na hivyo kuona kufanya biashara ya hasara tu, hata hakiwezi kuwasaidia kukidhi maisha yao.

Walisema tangu mgogoro huo uanze kufurukuta ni takribani wiki tatu sasa jambo lililowalazimu baadhi ya makambi ya wavuvi kufungwa baada ya wakala na baadhi ya wavuvi wa samaki kukaa vikao zaidi ya mara nne kujadili muafaka wao bila mafanikio.

Mmoja wa wavuvi na wakala wa samaki katika kisiwa cha Ikuza, Bw. Collins Joshua akizungumza na Majira kwa njia ya simu kutoka visiwani humo alisema, hatua waliofikia kwa sasa inasikitisha kwani wavuvi wamelazimika kupaki mitumbwi yao na hivyo hakuna anayejisughulisha na kuvua samaki kwa ajili ya kuwauzia wamiliki wa viwanda ambao wanaonekana hawana bei inayoeleweka kwao.

Bw. Joshua alisema serikali inatakiwa kuingilia kati ili kuweza kubaini kama bei ya samaki imeshuka katika soko la dunia ni kwa kiasi gani na kwa nini na wamiliki wa viwanda wanatakiwa kununua samaki kutoka kwao kwa kiasi gani na si kubaki kujipangia bei kama ilivyo kwa hivi sasa ambapo kila kiwanda kina bei yake.

“Juni 4, mwaka huu tulipewa taarifa kutoka kwa wamiliki wa viwanda kuwa bei ya samaki imeshuka katika soko la dunia, tena Juni 8 tukaambiwa kuwa sasa watanunua samaki kwetu kwa sh. 3,500, hatujatulia kutafakari hilo Juni 9 mwaka huu tunapewa taarifa nyingine kuwa wananunua samaki iliochakatwa kwa sh. 3,000 kwa kilo, hatujatafakari tena tunashangaa Juni 12, mwaka huu tena tunaambiwa kwa sasa wananunua samaki aina hiyo kwa sh. 2,600, huu ni ubabaishaji, ya serikali kuwaachia watu hawa kufanya watakalo”alisema.

Alisema kwa kiasi hiki, wao hawawezi kupata kitu chochote zaidi ya kuwafanyia wamiliki wa viwanda jambo ambalo alieleza kuwa inatakiwa ijulikane wazi sasa biashara hiyo inafanywa kwa mfumo upi na sio kila kiwanda kujipangia bei yake.

“Kilio chetu kwa sasa tunataka kujua bei rasmi, samaki ambaye hajachakatwa ni shilingi ngapi, hali ya soko la samaki duniani iko vipi, bei imeshuka kwa kiasi gani na sababu ni nini, kuna maeneo mengine samaki wa maji baradi wameongezeka”alisema.

Alisema awali samaki alinunulia kutoka kwa mvuvi kati ya sh. 3,800 hadi 4,000 kwa kilo, ambapo wao mawakala walilazimika kuwauzia wamiliki wa viwandani kati ya sh. 4500 hadi 5500 kwa kilo lakini wanashangazwa na bei kushuka kutoka kiasi hicho hadi 2,600 kwa kilo jambo linalowashinda wao wanunue samaki hao kwa mvuvi kwa kiasi gani ikizingatiwa kuwa bei ya mafuta na vifaa vya uvuvi vikipanda bei kila kukicha.

Mwisho.