Mkutano wa kimataifa wa wadau wa chanjo kufanyika nchini

Tanzania itakuwa mwenyeji wa mkutano wa Kimataifa wa wadau wa chanjo Duniani “Global Alliance for Vaccine and Immunisation (GAVI) Partners Forum. Mkutano huo utafanyika mjini Dar es Salaam kuanzia tarehe 5 hadi 7 Disemba 2012.

Mkutano unatarajia kuwa na washiriki wapatao 600 kutoka nchi mbalimbali duniani wakiwemo Wake wa Marais, Mawaziri wa Afya, Fedha na watu mashuhuri kutoka nchi 73 zinazohisaniwa na GAVI.

Lengo la mkutano huu ni pamoja na kujadili mafanikio na changamoto zilizopo katika utoaji wa huduma za chanjo duniani. Mkutano huo ni wa kwanza  kufanyika katika bara la Afrika na ni wa tano duniani tangu kuanzishwa ushirika wa wadau hao wa GAVI. Mikutano kama hii ilishafanyika katika nchi za Netherland (2000), Senegal (2002), India (2005) na Vietnam (2009).

Sababu ya mkutano huu kufanyika nchi Tanzania ni pamoja na nchi yetu kuonyesha mafanikio makubwa katika utoaji wa huduma za chanjo za watoto na akina mama wajawazito. Hivyo basi washiriki watapata fursa ya kutembelea vituo vinavyotoa huduma za chanjo nchini ili kujionea mafanikio, changamoto zilizopo pamoja na kujifunza.

Aidha, katika mkutano huo, washiriki watapata fursa ya kujadili masuala ya chanjo ikiwemo uingizwaji wa chanjo mpya na masuala ya afya ya mama na mtoto. Pia washiriki watapata nafasi ya kubadilishana uzoefu kutoka nchi zao jinsi ya uanzishaji wa chanjo mpya, utengenezaji, uhusishwaji wa viwanda vya chanjo, pamoja na mikakati ya kuboresha huduma za chanjo katika nchi mbalimbali. Aidha, kutakuwa na mkusanyiko wa wataalam wa huduma za chanjo, wafanyabiashara mashuhuri na viongozi mbalimbali ambao kwa ujumla wao huhusika sana katika maamuzi ya utoaji wa huduma za chanjo

Mkutano huo wa siku tatu utafunguliwa rasmi na Rais wa Jamhuri ya Muungano wa Tanzania Mhe. Dkt. Jakaya Mrisho Kikwete tarehe 5 Desemba, 2012. Kutakuwa na uzinduzi wa chanjo mbili mpya za magonjwa ya Kuhara , Nimonia na homa ya Uti wa Mgongo kwa watoto (Pneumoccocal na Rotavirus vaccines) chini ya mwaka mmoja) ambazo zitatolewa hapa nchini kwa uhisani wa GAVI. Chanjo hizo zinatarajiwa kuanza kutolewa mapema mwezi ujao nchi nzima.

 Imetolewa na:

 Regina L. Kikuli

KAIMU KATIBU MKUU

WIZARA YA AFYA NA USTAWI WA JAMII

04/12/2012