Maonesho ya jua kali kufanyika Burundi

Wajasiriamali kutoka Zanzibar, wakiwaonesha wananchi waliotembelea banda la Tanzania tarehe 3/12/2012 jinsi ya kutengeneza sabuni ya maji kwenye maonesho ya 13 ya Nguvu Kazi/Jua kali yanayoendelea katika viwanja vya Musee Vivant mjini Bujumbura.

……………………………………………………..

Maonesho ya 13 ya Nguvu Kazi/Jua kali yameanza tarehe 2/12/2012 katika viwanja vya Musee Vivant mjini Bujumbura Burundi.

Nchi ya Burundi imeandaa maonesho haya kwa mara ya kwanza baada ya nchi za Burundi na Rwanda kujiunga na Jumuiya ya Afrika Mashariki mwaka 2007.

Idadi ya wajasiriamali 700 wanashiriki maonesho haya ambapo Tanzania imepewa nafasi 185, Kenya nafasi 185, Uganda nafasi 70, Rwanda nafasi 60 na mwenyeji Burundi imepewa nafasi 200.

Maonesho haya ni mojawapo ya njia muhimu za kuwajengea uwezo wananchi walio katika ngazi za chini kabisa katika ujasiriamali.

Akiongea katika viwanja vya maonesho haya, Mwenyekiti wa muda wa Shirikisho la Vyama vya Wajasiriamali Tanzania (CISO-T) ambaye pia ni mjasiriamali wa muda mrefu, Bibi Lida Msaki anasema maonesho haya yana faida kubwa sana kwa wajasiriamali.

Bibi Msaki anasema yeye ameshiriki maonesho haya tangu yanaanza mwaka 1999 na ameweza kufahamiana na watu wengi ikiwa ni pamoja na wajasiriamali wa Afrika Mashariki, amepata ujuzi wa jinsi ya kuboresha bidhaa zake, kubadilishana ujuzi, vile vile ameweza kuuza bidhaa zake kwa wingi na kuweza kujiongezea kipato kikubwa sana.

Bibi Msaki anatoa wito kwa wajasirimali kuwa wasiogope na wasivunjike moyo katika kushiriki maonesho haya ili waweze kupanua uwigo wa bidhaa zao.

Ameishukuru Serikali kwa kuweza kuona umuhimu wa wajasiriamali na kuwa nao bega kwa bega  kwa kutoa msaada mkubwa sana kwao wa kusafirisha bidhaa zao na kuweza kufika salama kwenye maonesho bila bugudha yoyote.

Anasema Serikali imetoa mchango mkubwa sana katika kuwasaidia wajasiriamali maana bila Serikali wasingefika hapo walipo sasa.

Ameiomba Serikali izidi kuwasaidia wajasiriamali hasa katika kuboresha bidhaa zao ili ziwe zenye ubora zaidi hasa kwa upande wa vifungashio

Mjasiriamali kutoka Lindi, Bwana Amir Chembe ambaye shughuli zake kuu ni uhunzi anasema yeye ni mara yake ya kwanza kushiriki maonesho haya.

Bwana Chembe anasema yeye ameanza shughuli  hizi muda mrefu ila alikuwa anaogopa kushiriki maonesho haya kwa kuwa yanashirikisha nchi nyingine za Afrika Mashariki.

“Uoga ulinifanya nishindwe kushiriki maonesho haya kwa muda mrefu sana, lakini namshukuru sana Mungu kwa kunipa ujasiri wa kuweza kushiriki maonesho haya kwa mwaka huu, hivyo nawaomba wajasiriamali wasiogope kushiriki”. Bwana Chembe anasisitiza.

Bwana  Chembe anasema matarajio yake katika maonesho haya ni pamoja na kujifunza kutoka kwa wajasiriamali wengine, kutafuta masoko ya bidhaa zake na pia kufahamiana na wajasiriamali wa nchi nyingine.

Maonesho haya yanatarajiwa kufunguliwa rasmi tarehe 5/12/2012 na Rais wa Burundi Mhe. Pierre Nkurunziza na yatafungwa tarehe 9/12/2012.