Unyama huu wa Jeshi la Polisi Kagera ni mpaka lini?

Na Theonestina Juma, Bukoba

BAADHI ya wakazi wa mtaa wa Kyaya kata ya Kahororo katika Manispaa ya Bukoba wanalazimika kulala porini  na kushindwa kushiriki shughuli za maendeleo kutokana na kuogopa askari polisi wanaowavamia katika majumba yao saa sita za usiku wakiwa wamelala.

Hayo yamebainika jana wakati wananchi wa mtaa huo wapatao wanane wakizungumza na waandishi wa habari mkoani hapa ambapo walisema kuwa Juni 30, mwaka huu saa 5 usiku askari polisi wapatao 12, wakiwa na baadhi ya walinzi wa shule ya sekondari ya Nyashenye wakiwa na silaha huku wamevaa kiraia waliwavamia nyumba tano na kuwakamata baadhi ya wananchi wenzao.

Wananchi hao walisema chanzo cha kuvamiwa na polisi hao ni kutokana na mgogoro wa ardhi wa tangu mwaka 1987 uliopo kati yao na  uongozi wa Shule ya sekondari ya Nyashenye inayomilikiwa na Kituo cha Bukoba cha Waislam mjini hapa (Bukoba Islamic Center) ambao wanataka wananchi hao wahame kwa madai kuwa wako katika ardhi yao.

Wananchi hao walisema  kwa kipindi kirefu sasa hawaishi kwa amani katika mtaani hapo kutokana na mgogoro huo kuingiliwa na Polisi kwa shinikizo na kiongozi mmoja wa kisiasa mjini hapa ambaye anawadhifa kubwa serikali anayedaiwa kuulinda uongozi wa shule hiyo kwa maslahi binafsi ya familia yake.

Walisema kwa siku nne sasa amani imetoweka kabisa katika eneo lao, ambapo wanakaa chonjo wakati wote kutokana na kutojua ni muda gani polisi watafika katika eneo hilo kwasomba kwani inavyoonekana kwa sasa polisi wanaonia ya kutaka kusomba mtaa mzima kuishia gerezani.

Waandishi wa habari waliolazimika kwenda katika mtaa huo ambao uko umbali wa takribani kilomita  tatu kutoka katika kituo kikuu cha polisi mjini hapa, ulishuhudia woga wa wananchi ambapo baadhi ya wananchi walipoiona teksi iliowapeleka waandishi hao katika eneo hilo, kila mmoja alianza kutimua mbio, ambapo naadhi yao aliweza kusitisha  baada ya kuona kamera za waandishi hao.

Aidha waandishi hao waliweza kushuhudia baadhi ya milango na madirisha ya nyumba za wananchi hao zilizobomolewa  na polisi hao usiku wa manane, ambapo wamiliki wa nyumba hizo walikamatwa na polisi hao na hivyo kulazimu wanandugu kuwalindia nyumba zao nyakati za usiku.

Baadhi ya watu waliovamiwa na polisi usiku huo wa manane na kuharibiwa nyumba zao ni pamoja na Bw.Robert John (65), Richard Ifunya (60), Charles Robert (27) na mwanamke pekee Bi. Joyce Anatory (22) na mwanae  Debora Jairos mwenye umri wa mwaka mmoja na nusu ambaye naye ameswekwa rumande pamoja na mama yake licha ya kusumbuliwa na  ugonjwa wa malaria.

Nyumba ya Bw. John ilivunjwa dirisha, kwa Bw. Ifunya waling’oa kabisa mlango wake huku kwa Bw. Robert mlango wa nyumba sehemu ya juu ikiwa ilipigwa na kitu kizito na kutikisika.

Makazi mmoja wa mtaa huo, Bi. Mamerita Ntinabo (53) alisema taasisi hiyo ya shule ilikuja kwa  lengo nzuri mwaka 1986 la kuomba ardhi kujenga shule ambapo walipewa eneo lakini cha kushangaza ni kuwa walikuwa wakijiongeza eneo la wananchi huku wakiwapatia vitisho ambapo wamefikia hatua ya kutumia wanafunzi wa shule hiyo kung’oa mazao yao na kwamba hakuna  hata mwanafunzi yeyote kutoka mtaa huo anayesoma katika shule hiyo.

Mwenyekiti wa Mtaa huo, Bw. Gilbert Makwabe akizungumza na waandishi wa habari juu ya tukio hilo alisema wakati wananchi wake wakivamiwa usiku wa manane na kusombwa na polisi  alikuwa safarini  Jijini Dar Es Salaam.

Hata hivyo akizungumzia sababu za kukamatwa kwa wananchi hao ni kutokana na mgogoro wa ardhi kati ya wananchi na uongozi wa shule hiyo ya Nyashenye, ambapo chanzo cha mgogoro huo ulianza mwaka 1987 wakati Rais awamu ya pili Ally Hasan Mwinyi alipofika eneo hilo kuweka jiwe la msingi ambapo katika taarifa ya uongozi wa shule hiyo kwa rais huyo ilieleza kuwa wananchi tayari walishafidiwa zaidi ya sh. milioni 78.3 jambo liliowafanya wanachi kushtuka ni kujihoji ni nani aliyechukua hela hiyo miongoni mwao.

“Unajua walipoanza kujenga wananchi hawakujua wanataka ardhi kiasi gani, lakini kutokana na risala waliomsomea Rais Mwinyi mwaka 1987 ndiyo uliosababisha mvurugano kuanza, kwani wananchi walianza kuona wakienda kulima katika hilo mbuga uongozi wa shule ulianza kuwafukuza… hapa ndipo wananchi walianza kusema kumbe hawa wanataka eneo hili lote”alisema

Bw. Makwabe alisema hadi sasa hekta 81 ndizo zinazogombaniwa kwani ni kama kuchukua kijiji kizima, ambapo katika uongozi wa serikali za mitaa hakuna kumbukumbu inayoonesha shule hiyo kumilikishwa eneo hilo.

Kwa upande wa Makamu Mkuu wa shule hiyo, Bw. Masoud Hussein akizungumza na waandishi wa habari alisema wananchi hao walivunja vigingi vipatazo 10 za shule hiyo ambapo walialazimika kutoa taarifa kituo cha polisi ambapo alisema kuwa hakuna mlinzi wa shule hiyo aliyeambatana na polisi kuwabomolea wananchi hao nyumba zao wala katika ukamataji wao.

Alisema wananchi hao wanao kikundi cha watu fulani ambao wanawasukuma ili kuwafanyia fujo ambapo eneo hilo wanalimiki kihalali.

Hata hivyo kwa upande Kamanda wa polisi Mkoa Kagera, Phillip Kalangi akizungumza na waandishi wa habari alidai kutokuwa na taarifa zozote juu ya askari wake kuvamiwa wananchi usiku wa manane na kuwasweka rumande hali iliowalazimu waandishi wa habari kuwa mgbogo kwa kauli yake kwani kwa wakati huo kuna baadhi ya wananchi hao walipiga kambi katika eneo la kituo hicho kuanzia asubuhi hadi jioni wakisubiri wenzao wafikishwe mahakamani ili waweze kuwawekea  dhamana ambapo jeshi hilo liligoma wananchi hao kupewa dhamana.

Hata hivyo baada ya waandishi hao kumbana zaidi Kamanda huyo, alifanya maarifa yake ambapo katika maelezo yake yasiokuwa na uthibitisho alidai kuwa wananchi waliokamatwa ni wale walioruka mdhamana mwezi machi mwaka huu, ambapo jeshi hilo walikuwa wakiwatafuta wananchi 15 walitakiwa kurudi kuripoti polisi hawakuweza kufanya hivyo.

Kamanda Kalangi alisema katika sako wao si lazima kuwatumia viongozi wa serikali za mitaa au kutokana na wao  kwa asilimia kubwa vikwazo kwa polisi.

Pia alisema wananchi hao wanatuhumiwa kuvunja uzio wa shule na kuingia eneo la shule bila kibali maalum, ambapo kwa uchunguzi waandishi katika eneo hilo la shule haukuweza kuona uzio wa shule uliovunjwa na wananchi hao hata kuvunjwa kwa milango na madirisha ya wananchi hao utafanyiwa uchunguzi na jeshi hilo.

Mwisho.