Nyoka mwenye miaka 209 mkongwe duniani anayepatikana Msitu wa Minziro kuanza kusakwa

Dkt.Felician Kilahama Mkurugenzi Mkuu wa Misitu na Nyuki nchini.

Na Theonestina Juma

KUWEPO kwa nyoka mwenye umri wa miaka 209 sasa katika msitu wa akiba ya serikali ya Minziro wilayani Missenyi, serikali imeazimia kuanza kumsaka kwa udi na uvumba .

Aidha kutokana na ukongwe wake duniani kote huenda akawa kivutio muhimu katika sekta ya utalii na hivyo kuifanya serikali kuanza kupiga mahebu yake ili kuweza kumnasa kirahisi.

Kauli hiyo imetolewa leo na Mkurugenzi Mkuu wa Misitu na nyuki nchini, Dkt. Felician Kilahama wakati akizungumza na waandishi wa habari  mjini Bukoba.

Dkt. Kilahama alisema nyoka huyo mwenye futi 47  anapatikana baada ya kuona viashiria ya mapito yake  yakiwa yameburuzwa buruzwa katika pori hilo, ambapo imekuwa vigumu sana kuonekana hadharani kutokana na kuishi kwenye mapango.

“Huyu nyoka lazima tumfanyie mahesabu, ya kumpata kirahisi, miaka 209…,sio mchezo…. ameweza kutambulika miaka baada ya kupima urefu wa mapito yake, kuna chatu na nyoka wenye mapembe pia…. “alisema Dkt. Kilahama.

Alisema licha ya kumfuata fuata nyoka ni jambo la hatari na inahatarisha maisha ya mtafiti hivyo lazima ifanyike uharaka wa kupandisha hadhi msitu huo wa akiba ili iwe hifadhi ya taifa ambapo utaweza kuboresha hata usimamizi wake, ambapo hata hivyo katika Kamati ya ushauri wa Mkoa Kagera (RCC) ulipitisha msitu huo upandishwe hadhi.

Nyoka huyo ambaye ni aina ya Giant Forest Cobra kichwa chake kina rangi nyekundu na sehemu ya kiwili wili ikiwa ni rangi ya kijani alianza kufanyiwa utafiti tangu mwaka 2000 baada ya kupatikana kwa taarifa kutoka kwa wenyeji wa maeneo hayo juu ya kuwepo kwa aina ya nyoka huyo katika msitu huo.

Kutokana na hali hiyo, ililazimu uongozi wa Halmashauri ya Missenyi, kupitia Maofisa wa Misitu mwaka 2010 kumtengeshea sindano katika mapito yake  kwa lengo la kuchukua damu yake, kwa ajili ya kupima  vina saba yake  iliyobainika kuwa na miaka zaidi ya 207 kwa mwaka huo.

Dkt. Kilahama alisema nyoka huyo atakuwa ni kivutio muhimu katika Mkoa wa Kagera iwapo atatafutwa na kupatikana  licha ya kuwa wanakabiliwa na tatizo la ukumbwa wa msitu huo ambao unajumla ya hekta 25,000 kwani  nyoka huyo amekuwa akihama hama katika harakati zake za mawindo.

Afisa Misitu wa Wilaya ya Missenyi, Bw. Wilbard Bayona alisema nyoka huyo anayo uwezo wa kuishi siku 68 bila kula chochote zaidi ya maji baada ya kumeza mnyama yeyote anayefanikiwa kumkamata.