Sensa 2012 wenyeviti wa mitaa Bukoba kulamba 5,000 kila siku!

Na Theonestina Juma, Bukoba

KILA Mwenyekiti wa serikali za mitaa atayehusika kuwatembeza makarani katika zoezi la sensa ya watu na makazi katika halmashauri ya wilaya ya Bukoba watalipwa sh. 5,000 kila siku, imeelezwa.

Hayo yamebainishwa na Mratibu wa sensa ya watu na makazi  ngazi ya vituo katika halmashauri ya Bukoba, Bw. Melchior Komba wakati akizungumza na Wakufunzi wapatao 125 kutoka katika Manispaa ya Bukoba na halmashauri ya wilaya ya Bukoba.

“Wenyeviti wa serikali za mitaa na vitongoji ni watu muhimu sana katika zoezi hili, tunawatambua, hivyo kila atakayehusika katika kuwatembeza makarani wetu wakati wa zoezi la sensa linalotarajiwa kuanza Agosti 26, mwaka huu atalipwa sh. 5,000”alisema.

Alisema si kwamba kila mwenyekiti atalipwa hata yule ambaye amekaa nyumbani, bali ni wale watakaohusika katika kuongoza timu ya uhesabuji  kaya moja hadi nyingine.

Alisema fedha hizo zitakuwa kwa msimamizi katika eneo la kuhesabia, ambaye ndiye atahusika zaidi na malipo yao hasa kwa wale watakaowaongoza katika zoezi hilo katika eneo husika.

Aidha Bw. Komba aliwataka wananchi kuwa makini kujibu maswali ya sensa watakayoulizwa na makarani wa sensa pindi watakapokuwa wanawafikia, lengo ni kutaka kupata takwimu sahihi kwa maendeleo ya taifa.

Agosti 12, mwaka huu, Umoja wa wenyeviti wa serikali za mitaa katika Manispaa ya Bukoba walitishia kugoma kushiriki katika zoezi la sensa ya watu na makazi kwa madai kuwa uongozi wa Manispaa ya Bukoba hauoneshi ushirikiano nao kuhusiana na zoezi hilo.

Umoja huo kupitia mwenyekiti wao Yusuf Mbagwa alisema licha ya kuwa vipeperushi vinavyosambazwa vinaonesha  wenyeviti wanahusika moja kwa moja katika zoezi la sensa lakini hawajawahi kupewa mafunzo yoyote yanayowaleza majukumu yao katika zoezi hilo.

Halikadhalika walidai kuwa hawawezi kushiriki katika zoezi bila bila kujua mstakabali yao juu ya maslahi yao.