Nataka maonesho ya Nane Nane 2013 wakulima wanaletwa wengi kujifunza na si hawa watalii

 MKUU wa mkoa Kagera, kanali Fabian Massawe ameziagiza Halmashauri zote za Wilaya mkoani hapa kuhakikisha maonyesho ya mwaka 2013 wanaleta wakulima wengi ili kuweza kujifunza mbinu mpya za teknolojia  ya kilimo cha kisasa chenye tija.

 Kanali Massawe alitoa kauli hiyo juzi wakati akifunga manonesho ya Nane Nane yaliofanyika katika viwanja vya Kyakailabwa nje kidogo ya Manispaa ya Bukoba na kushirikisha halmashauri zote za mkoani hapa.

 Alisema kutokana na maonesho hayo ya Nane Nane ni siku ya maalum nay a kipekee kwa wakulima,halmashauri zinatakiwa kujipanga kikamilifu kuhakikisha kuwa wanawaleta wakulima wengi pamoja na wafugaji kwa lengo la kuja kujifunza mbinu mbali mbali za kilimo na ufugaji bora ili kuweza kuongeza tija kwao na si kuwaleta wachache wanaowachagua wao

.“Naamini kila mkulima anahamu ya kutaka kushiriki katika maonesho haya, msiwe mnawachagua, waleteni wengi ili nao wajifunze si kuwaleta wachache kama ninavyohuhudia kwa hi sasa”alisema Kanali Massawe.

 Halikadhalika aliiagiza kamati ya maandalizi ya maonesho hayo kwa mwaka huu  mkoani hapa kuanzisha maonyesho ya mifugo (wanyama) ili na sekta ya mifugo iweze kupata hamasa ya kutoa elimu kwa wafugaji kujifunza kufuga kisasa kuondokana na ufugaji wa kienyeji usiokuwa na tija.

 Alisema kila mwaka maonesho hayo kwa asilimia kubwa huusisha wakulima wengi kuliko wafugaji na hivyo kuwanyima fursa yao muhimu.

 Katika hatua nyingine, Mkuu huyo aliwataka wananchi kushiriki katika vikao vya kuibua miradi ya maendeleo katika maeneo yao ambapo alibainisha kwamba  miradi ya kilimo inamilikiwa na wananchi wenyewe pamoja na Halmashauri za Wilaya.

 Pia alitoa wito kwa wakulima kuanza  ufugaji wa nyuki ili kujipatia kipato kutokana na kuuza asali.

  “Asali ya mkoa wa Kagera ni asali bora duniani ambayo ina kiwango cha hali ya juu, pia kimeanzishwa kiwanda cha kusindika asali mkoani Pwani, fugeni nyuki ina soko kubwa duniani kote.” aliwasistiza wakulima hao.

Mwisho.