Wiki ya kumbu kumbu na maziko rasmi ya masalia ya Kadinali Rugambwa yaanza leo Bukoba

Na Theonestina Juma, Bukoba

MAKAMU wa Askofu waKanisa Katoliki Jimbo la Bukoba, Dkt. Methodius Kilaini amewataka waumini kanisa Katoliki Mkoa Kagera kushiriki kikamilifu katika wiki ya sherehe ya Muadhama Laurean Kadinali Rugambwa anayetarajiwa kuzikwa masalia yake rasmi Oktoba 6, mwaka huu katika kanisa kuu la Jimbo la Bukoba.

Rai hiyo imetolewa leo na Askofu Dkt.Kilaini wakati akihubiri katika misa ya pili iliofanyika katika la kanisa la Rumuli ikiwa ni kuanza kwa wiki ya maadhimisho ya Kadinali Rugambwa.

Askofu Kilaini alisema kwa kumuenzi zaidi matendo ya Kadinali huyo, mweusi wa kwanza Mwafrika, waumini wanapaswa kushiriki katika sherehe zake zilizoanza kuadhimishwa katika Jimboni humo Septemba 30, mwaka huu ambapo kilele cha maadhimisho hayo yatakuwa Oktoba 7, mwaka huu.

Alisema katika sherehe hizo za kuhamisha masalia ya Kadinali Rugambwa Oktoba 6, shughuli hizo zitaanza asubuhi katika parokia ya Kashozi alikozikwa kwa muda ambapo yatafanyika maandamano kutoka katika parokia hiyo hadi kanisa kuu la Bukoba mjini.

Alisema shughuli za kuzika rasmi masalia yake yatafanyika kuanzia saa 9.00 alasiri ndani ya kanisa kuu ambalo alitaka akizikwe ambapo kanisa hilo tayari limeshakamika kukarabatiwa.

Akielezea kwa wiki nzima shughuli zitazofanyika, alisema kuwa ni pamoja na kusomwa misa katika kijiji alikozwaliwa cha Rutabo, alikobaziwa parokia ya Kagondo  na Rutabo alikojenga seminari ,Bunena mjini Bukoba  na kisha Kashozi ambako siku anatangazwa kuwa Askofu alikuwa akifanya shughuli za kiuchungaji katika parokia yote hayo ni kuadhimisha kumbu kumbu yake.

Alisema enzi za uhai wa kadinali Rugambwa alikuwa kiungo wa Waafrika, maaskofu wa kiafrika na waumini nje ya nchi hadi ikafikia hatua wazungu wakaanza kuwapa waafrika nafasi za uongozi.

“Kadinali Rugambwa alikuwa kama bendera iliowekwa juu ya milingoti ili kila mtu aione, hii ni kutokana na yeye aliweza kukaa na wazungu katika kiti kimoja kujadili mambo mbali mbali yahusuyo jamii na dini, hivyo yeye alikuwa kama kiungo”alisema askofu  Kilaini.

Alisema katika Tanzania Kadinali Rugambwa ni muasisi wa Baraza la maaskofu na alikuwa mchungaji mwema kutokana na kuwapenda waumini, watawa na mapadri wake.

Halidhalika alikuwa mpenda maendeleo, ambapo katika enzi za uhai wake aliweza kuanzisha miradi mbali mbali za kanisa kama ujenzi wa shule za sekondari, hospitali na vtuo vya afya ambapo alikubalika kwa dini zote kulingana na maelezo ya watu mbali mbali waliokuwa naye karibu.

Mwisho.