Waandishi wa habari Kagera walivyoandamana leo kulaani mauaji ya Daud Mwangosi

 Bango tu inatosha, soma.

 Tuko kushoto kulia, kulaani mauaji ya kikatili ya Daud Mwangosi.

 Kweli tunauchungu kumpoteza mwenzetu hivi hivi mkononi mwa polisi.

 Tunataka kamera yake irejeshwe kwa nini wanaikatalia?

 Mwenyekiti wa KPC Bw. John Rwekanika akitoa tamko

Wanahabari wakiwa kazini leo kulaani mauaji ya Mwangosi

Na Theonestina Juma, Bukoba

WAANDISHI wa habari mkoani Kagera leo wameandamana kulaani mauaji ya kikatili ya mwandishi wa habari wa kituo cha Luninga cha Chanel 10, Bw. Daud Mwangosi.

Maandano hayo yalioanza saa 3.40 asubuhi katika kituo cha mabasi mjini hapa na kupitia katika barabara za Jamhuri, tupendane, Kagera Studio, Samuel Luangisa ,Uganda kumalizikia katika Ofisi ya chama cha waandishi wa habari mkoani Kagera (KPC) yalikuwa rasmi kutokana na kuruhusiwa na Jeshi la polisi mkoani hapa na kuwapatia ulinzi.

Akizungumza mara baada ya kupokea maandamano hayo, Mwenyekiti wa chama cha Waandishi wa habari Mkoani Kagera (KPC), Bw. John Rwekanika alisema serikali inatakiwa kuwachukulia hatua kali za kisheria Askari wote waliohusika katika mauaji ya kikatili ya Bw. Mwangosi.

Alisema kulingana na picha zinavyoonesha mauaji ya Mwangosi yalikuwa ya kikatili yaliofanywa na Jeshi la polisi, kitendo ambacho kimefedhehedha taifa, na ni ukiukwaji mkubwa wa haki za binadamu.

Alisema askari waliohusika katika tukio la kifo hicho, wasimamishwe kazi ili kupisha uchunguzi unaoendelea ufanyike kwa uhuru na haki na Kamanda wa mkoa wa Iringa, Bw. Michael Kamuhanda awajibishwe na nafasi yake apewe mtu mwingine ambaye atakuwa tayari kutekeleza kwa vitendo ulinzi na usalama wa raia.

“Katika eneo la tukio, Kamanda wa Polisi mkoa wa Iringa  Bw. Kamuhanda alikuwepo,alishindwa kumwokoa marehemu mwangosi, hivyo ameshindwa kazi, awajibishwe nafasi yake apewe mtu mwingine ambaye yuko tayari kulinda usalama wa raia”alisema Bw. Rwekanika.

Alisema kulingana na mauaji hayo Jeshi la polisi linatakiwa kukaa chini na kujiuliza na kuangalia ni namna gani watakavyowalinda waandishi wa habari wakati wakitekeleza majukumu yao ya kazi za kila siku katika maeneo ya mikutano.

“Tunataka jeshi la polisi kuweka utaratibu utakaowezesha wanahabari kufanya kazi zao bila dharau na kujengewa hofu kutokana na vitisho vya polisi’alisema.

Halikadhalika serikali pia iandae utaratibu ambao wanahabari, wanasiasa na polisi watatumia kufanya kazi hasa katika kipindi hiki ambacho nchi inakuwa katika mfumo wa demokrasia ya vyama vingi ili kuepusha nchi situmbukie katika mazingira hatari zaidi.

Katika maandamano hayo waandishi hao wa habari walibeba mabango yenye ujumbe mbali mbali yaliosomeka kama, tunaangalia Jeshi la polisi kama rafiki wa mashaka, Mauaji ya Mwangosi na raia wengine ni kipimo cha kuzima uhuru wa habari na demokrasia, Waandishi wa habari tuhakikishiwe ulinzi na usalama wetu na Wanahabari tunalaani vitisho, mateso na mauaji wakati tukitekeleza wajibu wetu kwa umma.