CCM Kagera watimuwa madiwani wake wanane kwa kukihujumu

 

Na Theonestina Juma

HALMASHAURI kuu ya chama cha mapinduzi (CCM)mkoa wa Kagera,imewafukuza  madiwani wake  nane katika halmashauri ya Manispaa ya Bukoba kwa kile kilichoelezwa kuwa ni  kupuuza ushauri uliotolewa na Mwenyekiti wa CCM taifa  Rais  Jakaya Kikwete.

Akitoa taarifa kwa vyombo vya habari kwa niaba ya halmashauri kuu ya CCM mkoa, Katibu Mkuu wa chama hicho mkoa wa Kagera, Bw. Avelin Mushi,alisema kuwa uhamuzi huo umekuja kutokana na chama kujali maslahi ya wananchi tofauti ya watu binafsi.

Mushi amewataja madiwani hao nane kuwa  ni pamoja na Bw.Yusuph Ngaiza,kata Kashai ambaye pia ni Mwenyekiti wa ccm wilaya Bukoba, Bw.Samwel Ruangisa(Kitendaguro) meya mstaafu na mkuu wa mkoa wa mkoa wa kwanza wa mkoa wa Kagera.

Wengine ni  Bi.Murungi Kichwabuta(Viti maalumu) Bw.Deusdedith Mutakyawa(Nyanga) Bw.Richard Gaspar(Miembeni), Bw.Alexander Ngalinda(Buhembe) ambaye pia alikuwa Naibu meya  Bw.Dauda Kalumuna(Ijuganyondo)na  Bw.Robert Katunzi wa kata Hamugembe.

Bw.Mushi alisema  kuwa  kufukuzwa kwa madiwani hao ni kutokana na mgogoro ulidumu kwa muda mrefu juu ya mbunge na meya ambavyo Rais Kikwete akiwa ziarani Kagera alitoa agizo la wanachama hao kupatakana kwani hakuna vita visivyokuwa na mwisho wake.

Pia, alisema kuwa vikao vya chama vimekuwa vikiendelea kwa kufuata kanuni na taratibu kwa kuwaonya juu ya kuhujumu serikali ya CCM kwa kushirikiana na madiwani kambi ya upinzani kutotekeleza maendeleo ya wananchi lakini wahusika wote wamekuwa wakikahidi maagizo ya kuitwa kwenye vikao.