Historia ya Rais Mandela yalivyoapanda na kushuka

 

Nelson Mandela alichaguliwa kuwa rais wa kwanza mwafrika mweusi wa Afrika Kusini,baada ya vita vya muda mrefu dhidi ya utawala wa kizungu.

Alizaliwa mkoani Eastern Cape, lakini baadaye akatorokea mjini Johannesburg ambako alifanikiwa kuwa mwakili na kujiunga na haratakati za chama cha ANC dhidi ya utawala wa kizungu.

Kama kijana, Mandela alipenda masumbwi. ''Masumbwi ni bure, Ukiwa ulingoni , umri na hadhi yako pamoja na mali yako sio muhumu,'' aliandika katika kitabu chake kuhusu maisha yake 

Mwaka 1956, alituhumiwa kwa kosa la uhaini kwa sababu ya kazi yake na ANC. Wakati wa kesi yake, alikutana na mfanyakazi wa kijamii aliyeitwa, Winnie Mandela. Ndao yake kwa Evelyn Mase iliisha baada ya wawili hao kutalakiana. 

Nelson na Winnie walioana mwaka 1958 lakini hawakufurahia maisha yao ya ndoa kwani wote walikuwa wakikamatwa mara kwa mara. 

Kufuatia kesi ya pili ya uhaini dhidi ya Mandela, alifungwa maisha jela mwaka 1964

Hatimaye zaidi ya miaka ishirini baada ya kufungwa jela, Mandela aliachiliwa mwaka 1990.

Kufuatia kuachiliwa kwake, Mandela lizuru nchi nyingi na kukutana na viongozi wa dunia alipokuwa anjiandaa kuwania urais. Anaonekana hapa katika ubalozi wa Afrika Kusini mjini London ambako maandamano ya kupinga utawala wa kizungu daima yalikuwa yakifanyika.

Mashauriano makubwa yalifanyika kabla ya rais FW de Klerk kukubali au kuruhusu watu kupiga kura. Wawili hao walituzwa tuzo ya amani ya Nobbel, kwa sababu ya kumaliza ubaguzi wa rangi Afrika Kusini. 

Uchaguzi wa kwanaza wa kidemokrasia ulifanyika tarehe 27 mwezi Aprili m,waka 1994. Waafrika weusi walipanga foleni kupiga kura kwa mara ya kwanza. Chama cha ANC kilishinda uchaguzi huo kwa wingi wa kura na hivyo Mandela kuwa rais wa kwanza mweusi kuongoza Afrika Kusini

Mandela alitawala nchi hiyo kwa muhula mmoja pekee na mnamo mwaka 1999 akawa mmoja wa viongiozi wachache wa Afrika kuachia ngazi kwa hiari. Thabo Mbeki, alipewa jukumu la kumrithi Mandela kama rais na kiongozi wa ANC

Kando na kuwa kiongozi anayependwa zaidi duniani, pia aliweza kuonekana na mitindo ya kipekee kwa sababu ya T sheti zake nzuri nzuri. Hapa anawaluiza wandishi wa habari maoni yao kuhusu shati yake, baada ya maankuli ya mchana na muundajji wa mitindo Pierre Cardin 

Pia ana mambo mawili ambayo sio kawaida kwa viongozi wa dunia kuwa nayo....mpole na mwenye kuweza hata kujicheka , hapa anakutana na mwanamfalme Prince Charles na wanamuziki wa iliyokuwa bendi ya Spice Girls

Baada ya kutalakiana na mkewe Winnie , Mandela alimuoa Graca Machel, alipokuwa anasherehekea miaka  80 mwaka 1998. Bi Machel ni mjane wa aliyekuwa rais wa Msumbiji Samora Machel. Bi Graca na Mandela walianzisha hazina ya kuwasaidia watoto wasio na uwezo mkubwa maishani 

Tangu kuondoka mamlakani, mwaka 1999, bwana Mandela alikuwa mmoja wa viongozi wakuu kufanya kampeini dhidi ya ukimwi na utovu wa usalama wakati nchi yake ilipokuwa mwenyeji wa kombe la dunia mwaka 2010

Mwaka 2004, akiwa na umri wa miaka 85, Mandela alistaafu kutoka majukumu ya umma ili kuwa na muda na faimlia yake pamoja na marafiki zake. 

Bwana Mandela, aliweza kujitokeza wakati wa sherehe ya kufunga michuano ya kombe la dunia mwaka huo. Hali yake ya kiafya ilikuwa mbaya na alikuwa anaomboleza kifo cha kitukuu wake aliyeuawa huku michuano hiyo ikianza.

Rais Obama alivyotikisa Msibani Afrika kusini katika kuenzi Mandela

Licha ya kuwa ni siku ya huzuni kwa dunia nzima, hotuba ya Rais wa Marekani, Barack Obama imewagusa maelfu ya watu waliokuwa kwenye Uwanja wa FNB katika ibada ya kitaifa kumwaga Rais wa zamani wa Afrika Kusini, Nelson Mandela.

Obama aliyetumia dakika 20 katika hotuba yake iliyokuwa ikikatizwa na kelele za kumshangilia, aliwataka vijana wa Afrika na dunia nzima kuiga maisha aliyoishi Mandela kama yeye alivyojifunza mambo mengi kutoka kwa mzalendo huyo.

“Miaka 30 iliyopita nikiwa mwanafunzi, nilisoma Kitabu cha Mandela na tangu siku hiyo nilijifunza, nikajenga roho ya uthabiti. Iliamsha uwajibikaji kwa ajili yangu na kwa ajili ya watu wangu… hakika Mandela amenifanya niwe hivi nilivyo leo. Michelle na mimi tumenufaika sana na Mandela,” alisema Obama na kuongeza:

“Mandela alinifanya niwe mtu ninayesimama mbele yenu leo, alichangia kunifanya kuwa kiongozi bora. Nitaendelea kuiga mfano wake,”

Katika sherehe hizo, Obama alipokewa kwa shangwe na kushangiliwa kila alipopita na kila alipozungumza tofauti na ilivyokuwa kwa Rais wa nchi hiyo, Jacob Zuma ambaye alikuwa akizomewa.

Obama alimtaja Mandela kama kiongozi anayefaa kuigwa kwani pamoja na kukaa gerezani kwa miaka 27 akipigania uhuru, hakutaka kung’ang’ania madaraka na badala yake alistaafu kwa hiari yake, tofauti na viongozi wengi wa Afrika.

“Mandela alionyesha uongozi wa vitendo na kujaribu, alikuwa ni mwanamume, binadamu wa kawaida, mume, baba na kiongozi shupavu,” alisema Obama.

Pia Obama alisema, Mandela aliachiwa huru kama mfungwa, lakini kama mwalimu ambaye alitumika kutuonyesha kuwa, ni lazima kuwaamini wenzako ili nao wakuamini.

“Kufundisha upatanisho, hakuhitaji kudharau historia mbaya ya nyuma bali ni kuikabili kwa umakini, ukweli na uhalisia wake. Mandela alibadili sheria, lakini alibadili mioyo yetu pia,” alisema.

Katika risala hiyo, Obama alimtaja Mandela kama mwanamapinduzi mkubwa wa karne ya 20 aliyeibadilisha mioyo ya watu wake, akaimarisha mapatano na maelewano kwa wazungu na weusi.

“Amezaliwa kipindi cha Vita Kuu ya Kwanza ya Dunia, kijana aliyekuwa akichunga ng’ombe na kuteswa na wakubwa zake wa kikabila, lakini ameibuka na kuwa mwanamapinduzi mkuu wa karne ya 20,” alisema Obama.

Vilevile, Obama alimfananisha Mandela na Abraham Lincoln, Rais wa zamani wa Marekani kwa kuiunganisha nchi yake pale ilipokuwa inataka kuvurugika.

Rais huyo aliufanya umati katika uwanja huo ulipuke zaidi kwa furaha baada ya kuzungumza neno la Kizulu, ‘ubuntu’ linalomaanisha utu au ubinadamu ambapo alisema Mandela ameimarisha utu na ubinadamu kwa Waafrika Kusini.

“Alidumisha ‘utu’ miongoni mwetu. Utu ambao tunaweza kuupata kwa kushirikiana na kuwajali wanaotuzunguka,” alisema Rais huyo ambaye anatajwa kuwa Rais wa dunia. Obama alionyesha umahiri wake katika risala hiyo na katika sehemu ya risala hiyo alisema ni wajibu wa kila mmoja kuiga maisha aliyoishi Mandela.

“Ni lazima tujifunze kutoka kwake, kwa sababu Waafrika Kusini kwa jumla wao wameonyesha kuwa, tunaweza kubadilika.”

Obama alimtaja Mandela kama mtu asiyependa kujikweza bali aliyeshiriki kuonyesha mawazo yake na hofu na uhalisia wake hasa kwa kusema kuwa yeye si mtakatifu labda kama mtakatifu ni sawa na mwenye dhambi ambaye hachoki kujaribu. Kiongozi huyo alimalizia hotuba hiyo kwa nukuu muhimu za Mandela zinazosema kuwa, ‘Mimi ni kiongozi wa imani, mustakabali wangu, na mimi ni nahodha wa roho yangu’ na kuwataka Waafrika Kusini kuishi katika maneno hayo ya Mandela katika maisha yao.

“Hakika ilikuwa roho ya ajabu, tutamkumbuka sana. Mungu wabariki Waafrika Kusini,” alimaliza Obama. Kabla ya hotuba hiyo, Obama alifanya jambo la kihistoria kwa kupeana mikono na Rais wa Cuba, Raul Castro, kama ishara ya mapatano baada ya migogoro iliyoko baina ya nchi hizo mbili.

Kabla ya Obama kuzungumza, Katibu Mkuu wa Umoja wa Mataifa Ban Ki-Moon katika hotuba yake alisema kuwa, alijitoa muhanga kwa ajili ya usalama, uhuru na demokrasia ya nchi yake.

“Sherehe hizi za kumbukumbu zinadhihirisha upinde wa mvua wa taifa. Ninatumaini tutaweza kuuona upinde huo punde, kupitia mvua ya simanzi,” alisema Ki-Moon. Ki-Moon alimtaja Mandela kuwa ni kiongozi aliyejiandaa kupoteza kila kitu kwa ajili ya uhuru na demokrasia.

“Dunia imepoteza rafiki na mwalimu. Alikuwa ni zaidi ya viongozi wakubwa wa nyakati zetu; mwalimu mkuu aliyetufundisha kwa mifano,” alisema Ki-Moon.

Wakati huo huo, Mkuu wa Majeshi wa nchi hiyo, Jenerali Thanduxolo Mandela kwa niaba ya familia ya Mandela alipata nafasi ya kutoa risala yake kwa Rais huyo na alisema kuwa, familia hiyo ina bahati ya kuwa na mzazi kama Mandela.

“Utakumbukwa daima, hatuwezi kuusahau mchango wako katika familia na katika maisha ya Waafrika Kusini wote,” alisema Thanduxolo.

Baada ya Thanduxolo, walikuja wajukuu na vitukuu wa Mandela kwa niaba ya wajukuu wote, Pumla, Andile na Mbuso Mandela ambao walisema wana mengi waliyojifunza kwa babu yao ambaye walimtaja kuwa kioo cha familia na kuahidi kuwa wataishi na matendo yake.

Mandela atazikwa Jumapili.

CHANZO: MWANANCHI

Hali halisi ilivyokuwa jana katika kumbukumbu ya Nelson Mandela

Rais Jakaya Mrisho Kikwete na mkewe Mama Salma Kikwete wakiwa na Rais Mstaafu wa Marekani Mhe George W. Bush na Mkewe Laura Bush wakiwa jukwaa la viongozi na watu mashuhuri baada ya Kuadhimisha Kumbukumbu ya Kifo cha aliyekuwa kiongozi mashuhuri wa Afrika Kusini na duniani, Mheshimiwa Nelson R Mandela leo Desemba 10, 2013 katika uwanja wa FNB jijini Johannesburg.PICHA NA IKULU Rais wa Jamhuri ya Muungano wa Tanzania, Mheshimiwa Jakaya Mrisho Kikwete leo, Jumanne, Desemba 10, 2013, ameungana na viongozi wa mataifa mbali mbali duniani na maelfu ya wananchi wa Afrika Kusini Kuadhimisha Kumbukumbu ya Kifo cha aliyekuwa kiongozi mashuhuri wa Afrika Kusini na duniani, Mheshimiwa Nelson R Mandela.

Maelfu kwa maelfu ya wananchi wamehimili mvua kubwa iliyokuwa inanyesha kwa nguvu kwenye Uwanja wa Michezo wa FNB mjini Johannesburg kumwaga Mzee Mandela ambaye alikuwa ishara kuu ya upinzani wa siasa za ubaguzi wa rangi za makaburu wa Afrika Mashariki.

Mheshimiwa Mandela ambaye alifariki duniani Ijumaa iliyopita, Desemba 5, 2013, alikuwa Kamanda wa Jeshi la Ukombozi la Chama cha African National Congress la Umkhoto we Sizwe akafungwa jela kwa uhaini kwa miaka 27 na utawala wa Makaburu.

Baada ya kutoka jela mwaka Februari 1990, Mzee Mandela alichaguliwa kuwa Rais wa Kwanza wa Afrika Kusini ya mwaka 1994. Lakini Mheshimiwa Mandela alitumikia kipindi kimoja tu cha miaka mitano na kukataa kutumikia kipindi cha pili.

Kiasi cha viongozi 91 kutoka sehemu duniani wamehudhuria Kumbukumbu hiyo iliyokuwa na kila aina ya mchanganyiko wa hisia – wengine wakiwa na majonzi na wengine wakicheza na kuimba kwa muda wote wa shughuli hiyo iliyochukua kiasi cha jumla ya saa tano.

Mbali na Rais Kikwete ambaye amefuatana na Mama Salma Kikwete, marais wengine mashuhuri duniani waliohudhuria Kumbukumbu hiyo ni Mheshimiwa Barack Obama wa Marekani, Mheshimiwa Francois Hollande wa Ufaransa, Waziri Mkuu wa Uingereza, Mheshimiwa David Cameroun na Katibu Mkuu wa Umoja wa Mataifa (UN) Ban Ki Moon.

Kumbukumbu hiyo pia ilihudhuriwa na viongozi wa zamani wa Marekani wakiwemo marais watatu wa zamani wa Marekani – Mheshimiwa Jimmy Carter, Mheshimiwa Bill Clinton na Mheshimiwa George W Bush na mawaziri wakuu wawili wa zamani wa Uingereza, Mheshimiwa Tony Blair na Mheshimiwa Gordon Brown.

Rais Kikwete kesho, Jumatano, Desemba 11, 2013, ataungana na viongozi wenzake katia katika kutoa heshima za mwisho na kuuaga rasmi mwili wa Marehemu Mandela ambao utawekwa kwenye Majengo ya Urais wa Afrika Kusini ya Union Buildings mjini Pretoria.

Rais Mtaafu wa Afrika Kusini Nelson Mandela alivyotutoka, Tanzania kuomboleza siku tatu

 

THE UNITED REPUBLIC OF TANZANIA

 

DIRECTORATE OF PRESIDENTIAL COMMUNICATIONS

Telephone:

 

 255-22-2114512, 2116898

 

 E-mail: ikulumawasiliano@yahoo.com  press@ikulu.go.tz  Fax: 255-22-2113425

 PRESIDENT’S OFFICE,

 THE STATE HOUSE, P.O. BOX 9120, DAR ES SALAAM 

.

Tanzania 

.

 

TAARIFA KWA VYOMBO VYA HABARI

Rais wa Jamhuri Ya Muungano wa Tanzania, Mheshimiwa Jakaya Mrisho Kikwete amemtumia Salamu za rambirambi Rais Jacob Zuma wa Afrika ya Kusini na kupitia kwake, kwa mkewe Bi. Graca Machel, wanafamilia wote na wananchi wote wa Afrika ya Kusini kufuatia kifo cha Mzee Nelson Mandela kilichotokea tarehe 5 Desemba, 2013 baada ya kuugua kwa muda mrefu.

Rais ameuelezea msiba huu kuwa ni msiba mkubwa kwetu sote. "Afrika ya Kusini, Afrika na dunia kwa ujumla imepoteza mtu mashuhuri na shujaa mkubwa wa Karne ya 20 na 21.Tunaelewa machungu waliyonayo wananchi wa Afrika ya Kusini kwa kupoteza kiongozi shupavu, jasiri, mwana mapinduzi , mvumilivu na mstahimilivu".

 Ameongeza Rais Kikwete. Rais amemuelezea Mzee Mandela kuwa ni kielelezo cha aina yake kwa wanadamu kwa moyo wake wa kusamehe, huruma na upendo uliomuwezesha kuwaunganisha wananchi wa Afrika ya Kusini kuwa taifa moja baada ya kipindi kirefu cha mapambano dhidi ya ubaguzi wa rangi.

"Mandela ni mfano bora kwa wanadamu wa jinsi binadamu muungwana anavyopaswa kuwa . Ni wajibu wa wana Afrika Kusini, Afrika na dunia kwa  jumla kuiga mfano wake hasa moyo wake wa uzalendo, kujitolea hata maisha yake kwa ajili yake na wananchi wenzake" 

 .Rais ameongeza kusema,

"Tuzidi kumuombea kwa Mwenyezi Mungu ailaze roho ya Marehemu Mzee Mandela mahali pema peponi".

=

Abiria 20 wanusurika kifo Bukoba baada ya gari waliokuwa wakisafiria kushindwa kupanda mlima na kupinduka

 Kundi la watu wa Kata ya hamguembe wakishuhudia gari aina ya haice liliopinduka baada ya kushikwa kupanda mlima wa Nyangoye  ikiwa ni mwendo wa nusu kilomita kutoka stendi ya mabasi ya Basi ya Bukoba kuelekea Wilaya ya Muleba.Hiace hiyo ilikuwa imebeba abiria zaidi ya 20, wote walipona

 Watu wakiwa hawaamini kama kweli abiria waliokuwemo ndani ya gari hili kama walitoka hai

 Kila aliyekuwa na uwezo wa kuchukua kumbu kumbu kwa kutumia simu yake aliruhusiwa kwani ilikuwa ni utawala binafsi kwa sababu polisi hakuwepo muda huo.

 Huyu jamaa akichungulia kwa makini ndani ya gari hilo kama kuna abiria yoyote amebaki huyo kwa lengo la kumwokoa, pia na mali zao.

Huundiyomlima wa Nyangoye ambao gari hilo lilishindwa kuupanda likiwa limesheni abiria

 Dakika tano tu kupita baada ya ajali kutokea eneo hilo lilikuwa kama gulio, kutokana na uwingi wa watu kufurika kutaka kushudia ajali hiyo kwa macho yao bila kusimuliwa

 Hii ni hatari

Majambazi 88 wanaswa miongoni mwao watano ni walanguzi wa silaha na wasambazajia

Na Theonestina Juma, Bukoba

OPERESHENI kimbunga awamu ya pili inayoendelea katika baadhi ya mikoa ya Kanda ya Ziwa imefanikiwa kuwanasa majambazi 88,miongoni mwao watano  wamebainika kujishughulisha na biasharaya kulanguzi wa silaha kutoka katika mnada wa nchi jirani kwa sh. 300,000 na kuingiza nchini na  kuuza kwa mamilioni ya fedha.

Hayo yamebainishwa leo na Naibu Kamishina wa Operesheni Kimbunga, Simon Sirro wakati akizungumza na waandishi wa habari  mjini Bukoba juu ya maendeleo ya opereheni hiyo inavyoendelea hadi hivi sasa.

Kamanda Sirro alisema jumla ya majambazi 88 wamekamatwa katika zoezi hilo miongoni mwao watano ni wanaojihusisha na biashara ya kwenda nchini jirani ya Burundi kulangua silaha hizo kwa sh.300,000 na kuingiza nchini na kuziuza kuanzia sh. milioni 1.5 na kuendelea kwa bunduki aina ya SMG.

Halikadhalika miongoni mwa hao watano watatu wamebainika kujihusisha katika usambazaji wa silaha hizo kwa wateja humu nchini ambapo majambazi hao wote wamebainika kuwa ni Watanzania.

“Kuna jambazi mmoja ambaye ni Raia wa Tanzania yeye awali alikuwa akifanya biashara ya kuuza mbuzi nchini Burundi baada ya kuwalangua kutoka humu nchini, lakini baadaye alishawishia na watu wengine kuwa biashara ya mbuzi halilipi bali biashara ya kuuza silaha ndiyo inalipa naye akajiunga katika shughuli hiyo”alisema Kamanda Sirro bila kuwataja majina yao.

Alisema katika operesheni hiyo, awamu ya pili ilioanza Septemba 21 hadi Oktoba mosi mwaka huu, wamefanikiwa kuwakamata  wahalifu 529 wahamiaji haramu  wakiwa ni 425 kutoka katika mikoa ya Geita, Kigoma na Kagera.

Alisema wahamiaji haramu waliorushwa kwa  maamuzi ya mahakama ni 159, waliorudishwa kwa hiari ni 122, walioachiwa huru 39 huku wanaoendelea kuhojiwa wakiwa ni 105.

Alisema kati ya wahamiaji haramu hao waliokamatwa, Wanyarwanda  ni149, Warundi180, Kongo 14, Waganda 82,

Pia watu watano wanashikiliwa kwa tuhuma ya kutorosha na kuwahifadhi wahamiaji haramu   pamoja na majamngili 11.

Halikadhalika silaha mbali mbali zipatazo 23 zimekamatwa ambazo ni pamoja na SMG 3,pistol 2, magobole 18, risasi 484 za bunduki aina ya SMG/SAR  zikiwa ni 471 na pistol 13, magazine  mbili na bomu la kutupwa kwa mokono likiwa ni moja na sare moja ya jeshi la nchi jirani ya Burundi.

Katika hatua nyingine Kamanda Sirro alisema ng’ombe 2,220 wamekamatwa ambapo ng’ombe  103 mali ya Bw. Kalemela  George wilayani Biharamulo imeamuriwa na mahakama kutaifishwa  baada ya kuwangiza katika hifadhi ya taifa  Biharamulo  kinyume cha sheria na hivyo kutoa wito kwa wanaofanya biashara ya nyama mkoani Kagera kwenda  kununua kwa ajili ya kuchinja na kuuza.

“Hatua hii ya kutaifishwa na serikali hao ng’ombe itakuwa na matokeo katika jamii, hivyo wale wanaouza nyama mabuchani wanaohangaika kutafuta ng’ombe wa kuchinja kwa ajili ya kupata nyama ya kuuza wasisite kwenda wilayani Biharamulo kununua ng’ombe”alisema.

Alisema ng’ombe wanaobaki bado wanafanya utaratibu wa kufikisha kesi zake mahakamani ili nao waweze kutaifishwa.

Kwa upande wa Kaimu Mkuu wa Mkoa Kagera ambaye pia ni Mkuu wa wilaya ya Missenyi, Kanali Issa Njiku akizungumzia juu ya zoezi hilo alisema zoezi hilo bado linaendelea na ni endelevu na kwamba linaenda kiawamu  na hivyo wanaodhani kuwa zoezi hilo limekwisha wanajidanganya.

Alisema ni wajibu wa wanannchi kuendelea kutoa ushirikiano kwa maofisa wanaofanya kazi ya kuwatafuta majangili, majambazi, wahamiaji haramu kutoa ushirikiano kwao.

Mwisho.

CAG atua Bukoba, awaonya wahusika kutembeza vibahasha kwa wakaguzi

• Mdhibiti na Mkaguzi Mkuu wa Fedha ya Serikali Bw.Ludovick Utouh amewasili mkoani Kagera kwa ajili ya kufanya Ukaguzi maalum katika Manispaa ya Bukoba ili kutafuta ufumbuzi wa  kutatua mgogoro uliodumu takribani miaka miaka miwili na kukwamisha maendeleo ya wananchi wa Manispaa hiyo.

  Bw. Ludovick mara baada ya kuwasili katika mkoa wa Kagera Septemba 30, 2013 alifanya kikao cha ufunguzi wa Ukaguzi Maalum katika Manispaa ya Bukoba na kufafanua madhumuni ya Ukaguzi huo ikiwa ni pamoja na  ni namna gani ukaguzi huo utafanyika.  

  Bw. Ludovick alisema chimbuko la Ukaguzi Maalum lilitokana na hoja zilizojitokeza baada ya kutokea kutoelewana baina ya Waheshimiwa Madiwan wa Manispaa ya Bukoba ambapo ilisababisha mgawanyiko mkubwa  wa makundi na kuchangia kuzorotesha utendaji kazi wa Manispaa hiyo.

  Hoja hizo kuu zikiwa ni pamoja na kukosekana kwa uwazi kuhusu miradi ya uwekezaji ilivyopatikana, Mstahiki Meya kufanya maamuzi yake binafsi bila kushirikisha maamuzi ya Waheshimiwa Madiwani kupitia Baraza la Madiwani.

  Akifafanua kifungu cha sheria kinachompa mamlaka ya kufanya ukaguzi maalum Bw. Utouh alisema, “Kwa mujibu wa kifungu cha 36 cha sheria ya Ukaguzi wa Umma Na. 11 ya mwaka 2008, Mdhibiti na Mkaguzi Mkuu wa Hesabu za Serikali anayo mamlaka ya kufanya ukaguzi pale atakapoona kuwa inafaa  katika masuala yanayohusiana na fedha na mali za Umma.”

  Aidha Bw. Utouh alieleza kuwa alichelewa kufika katika Manispa ya Bukoba kufanya Ukaguzi Maalum kutokana na kukufanya maandalizi ya kutosha kabla ya ukaguzi huo ikiwemo na kuuandaa Adidu za Rejea wakati wa kufanya ukaguzi huo ili kutenda haki katika pande zote mbili na kuumaliza mgogoro.

  Adidu za Rejea 13 za Ukaguzi Maalum Manispaa ya Bukoba

  Kuchunguza usahihi wa utaratibu uliotumika kumpata mwekezaji wa kituo  cha kuosha magari (ACE Chemical Ltd),  Kuchunguza uhalali wa nyaraka na kiasi kilichowekezwa cha sh.297,000,000kwenye mradi wa kuosha magari

  Kuchunguza tatizo na sababu zilizopelekea viwanja 800 kutogawiwa kwa wananchi waliochangia gharama za upimaji, Kuchunguza wa upimaji viwanja 5,000

  Kuchunguza miradi wa ujenzi wa soko, ujenzi wa  kitega uchumi na kituo cha Mabasi, ujenzi wa chuo cha ualimu, ujenzi wa kituo cha maarifa na ujenzi wa Bwawa kwa ajilli ya utalii.

  Kuchunguza Kiwanja cha Shule ya Msingi Kiteyagwa, Barabara ya kupitia Kagondo Kaifo hadi Kagondo Karuguru na kuchunguza masuala mengine ya matumizi ya fedha yanayoashiria ubadhirifu.

  Onyo, Bw.Utouh pia alitoa onyo kali kwa viongozi wanaolumbana katika Manispaa ya Bukoba kutojaribu kuwarubuni wakaguzi ambao ameambatana nao katika ukaguzi huo. “Wakaguzi hawa ni wenye ujuzi wa kutosha na wa muda mrefu msije mkajaribu kuwapelekea vibahasha mtajisumbua bure na hawatapokea.” Alisema Bw. Utouh.

  Vilevile Bw. Utouh aliwaagiza Katibu Tawala Mkoa na Mkurugenzi Mtendaji wa Manispaa ya Bukoba Kuhakikisha kuwa watendaji wote walikwishahama na watahitajika kutoa maelezo katika ukaguzi huo maalum wapatikane ili kutoa ushirikiano wa dhati.

  Katika hatua nyingine Mkuu wa Mkoa wa Kagera Mhe. Kanali Mstaafu Fabian Massawe alimshukuru Mdhibiti na Mkaguzi Mkuu wa Fedha ya Serikali kufika mkoani hapa ili kutoa suruhu ya mgogoro wa muda mrefu uliokwamisha jitihada za kuwaletea maendeleo wananchi wa Manispaa ya Bukoba.

  Taarifa ya ukaguzi maalum katika Manispaa Bukoba itakamilika ndani ya siku 35 kuanzia Septemba 30, 2013 na mara baada ya kukamilika taarifa hiyo itakabidhiwa Ofisi ya Waziri Mkuu ili kuwawajibisha wale wote watakaobainika kufuja fedha na mali za serikali na kuuumaliza mgogoro uliodumu miaka miwili.

  Imeandikwa na:

  Sylvester Raphael

  AFISA HABARI

  RS-KAGERA@2013