Msisubiri majanga yatokee ndipo mtumie nguvu na gharama kubwa kuyakabili-Padri,ataka waumini wasiopoge kwenda kusali makanisani, waliofariki kwa bomu walikuwa wakishuhudia kristo

Na Theonestina Juma, Kagera

WATAWALA wa nchi wametakiwa kutosubiri mipango yapangwe hadi yakamilike ya kuvuruga amani nchini na baadhi ya watu waovu na ndipo waanze kutumia  nguvu na gharama  kubwa kuyakabili.

Kauli hiyo imetolewa  jana na Paroko Msaidizi wa Parokia  wa Kanisa katoliki Jimbo la Bukoba ya Bukoba Padri Remigius Rutashubanyuma wakati akihubiri katika misa ya pili katika kanisa la Bikira Maria wa Huruma mjini Bukoba.

Alisema matukio yanatokea hapa nchini na yanayozidi kutokea yanapangwa  na hivyo watala wala wananchi wasisubiri yatokee kwani  tayari watu wanakuwa wameshapoteza maisha, huku wengine wakidhurika kwa namna moja ama nyingine .

“Bora kinga kuliko tiba kamili, tusisubiri tukio litokee ndipo tutumie nguvu na gharama kubwa kuyakabili, iandaliwe mikakati mizuri ya kuzuia  mambo hayo yasitokee, wala yasiendelee kutokea”.

“Tukisubiri kukabiliana na majanga ambayo yameshatokea , watu watakuwa wameshapoteza maisha, wengine watakuwa wamedhurika , huwezi kumpa mtu pole kwa matukio ambayo yanakuwa yanapangwa heri kulinda usalama wa watu ili kuendelea kudumisha amani”alisisitiza.

Alisema wakati watawala wanaangalia namna ya kuendelea kulinda usalama wao nao wanaumini washirikiane nao katika kulinda usalama wa watu wote hasa kwa kuzingatia ulinzi shirikishi.

Alisema waumini wa kanisa hilo wasiogope kwenda kanisani kusali kwa kuhofia maisha yao kwani hata waliouawa na waovu kwa kuwalipuwa na bomu katika kanisa Katoliki parokia ya Mtakatifu Joseph Mfanyakazi  Olasiti Arusha waliuawa wakiwa wanamshuhudia kristo.

Alisema suala matukio yanayoendelea hadi makanisani haijulikani walengwa ni watu gani hasa, kwani hata kama wanauawa lazima yanamgusa kila mtu hata kama sio wewe mkristo  labda hata ndugu yako  na hivyo waumini hao wasiogope kwenda kanisani  kusali.

“Kwa hali kama hii naamini itafikia hatua waumini wakiogopa kwenda kanisani kusali, mimi nawaombeni msiogope, kwani huko ndiko kumshuhudia kristo, zingatieni ulinzi snhirikishi kwani kama ni  mipango kama ya uovu huo lazima unapangwa na ndugu zenu, marafiki zenu, watu wa ukaribu wenu”alisema.  

Alisema lazima watawala waliopewa jukumu la kulinda usalama wa raia wake na mali yao kuwahakikishia usalama  wa watu wake kwani jukumu waliokabidhiwa ni kulinda amani na utulivu wa nchi na si wakati matukio  ya napangwa wanakaa kimya.

“ Kukaa kimya ina maana kuwa unakubaliana na hali halisi inayotokea , kwa sababu tukio kubwa haliwezi kutokea bila kuwepo kwa mipango ya muda mrefu, mipango yanakuwepo”alisema

Padri huyo alisema ni  jukumu la wanaumini  kulinda usalama wao kwani huenda watenda maovu hao wakawageukia hata waumini na hivyo wanatakiwa kujiamini na kuwa watu wa ibada muda wote, kwani kizazi cha sasa kinahitaji kufundishwa kwa vitendo zaidi kuliko maneno .

Aidha aliwataka waumini wa kanisa hilo kuwa watu wa kujiandaa muda wote , kwani matayarisho ni muhimu kuliko dhana ya ukristo.

Mwisho.